22.03.2018
Бязмежная размова
Што можа служыць універсальным сродкам зносін паміж рознымі людзьмі, акрамя звычайнага моўнага? Пачынаем загінаць пальцы: жэсты, міміка, інтанацыя, паўзы, манеры, знешнасць. А калі аб’яднаць усе гэтыя кампаненты ў адное, атрымаецца тэатр.
Менавіта такі спосаб наладжвання камунікацый з акаляючым светам стаў прыярытэтным у Асіповіцкай спецыяльнай агульнаадукацыйнай школе-інтэрнаце для дзяцей з парушэннямі апорна-рухальнага апарата. Напярэдадні Міжнароднага дня тэатра ва ўстанове сабраліся чатыры тэатральныя трупы, каб не толькі прадэманстраваць сваё майстэрства, але і знайсці праз сцэну ключ да ўзаемаразумення.
Гонар распачаць сустрэчу пад назвай “Культурны і знакаміты…” выпала раённаму ўзорнаму тэатру лялек “Ялінка” . Акцёры пад кіраўніцтвам Ларысы Мядзведскай прадставілі ўрывак з п’есы “Кошчын дом”. Гаспадары свята прадставілі да ўвагі сваіх гасцей пастаноўку “Мяшок яблыкаў” па казцы Уладзіміра Суцеева.
Больш сур’ёзнамі былі выступленні тэатральнага аддзялення ДШМ №1 і ўзорнага калектыву ЦТД іМ “Школьны тэатр” з спектаклем па казцы “Дадому” аўтарства Вольгі Саламонавай і ўрыўкам з п’есы-трагедыі Уільяма Шэкспіра “Рамэа і Джульета”. Нельга было сказаць, што мерапрыемства прызначалася толькі для дзяцей. У дзвюх апошніх пастаноўках акцёры адлюстравалі за знешнім гумарам глыбокія і сур’ёзныя моманты, над якімі не будзе лішнім падумаць і дарослым.
Цікава было паглядзець і на мультымедыйныя прэзентацыі, прысвечаныя зараджэнню і развіццю тэатральнага мастацтва ў свеце і гісторыі школьнага тэатра.
Завяршалася сустрэча своеасаблівым момантам рэфлексіі, калі гледачы па аднаму падыходзілі да стэнда з тэатральнымі маскамі, што сімвалізуюць драму і камедыю, і аддавалі свой голас у выглядзе аранжавага ці сіняга стыкера за любімы тэатральны жанр.
- Мы ўпершыню ўдзельнічаем у мерапрыемстве падобнага фармата, - падзялілася ўражаннямі кіраўнік “Ялінкі” Ларыса Мядзвецкая. – Вельмі цікавая і карысная ідэя. Здорава, калі яна стане традыцыяй.
РАЙГАЗЕТА “Асіповіцкі край” (Анна Шеремет)