26.02.2018

МАГІЛЁЎ ПРЫМАЎ ЮНЫХ ДАСЛЕДЧЫКАЎ

23-25 лютага 2018 года ва ўстанове адукацыі “Магілёўскі дзяржаўны абласны інстытут развіцця адукацыі” з мэтай развіцця інтэлектуальных здольнасцей вучняў, пашырэння кола іх адукацыйных інтарэсаў, павышэння якасці адукацыйнага працэсу па вучэбных прадметах быў праведзены рэспубліканскі конкурс работ даследчага характару (канферэнцыя) вучняў па вучэбных прадметах “Беларуская мова” і “Беларуская літаратура”.

У дадзеным конкурсе прымалі ўдзел 42 юных даследчыкі ўстаноў агульнай сярэдняй адукацыі з Брэсцкай, Віцебскай, Гомельскай, Гродзенскай, Магілёўскай, Мінскай абласцей і г. Мінска.

23 лютага прайшла цырымонія ўрачыстага адкрыцця конкурсу, падчас якой з прывітальнымі словамі да ўдзельнікаў, настаўнікаў, журы і арганізатараў звярнуліся галоўны спецыяліст упраўлення агульнай сярэдняй адукацыі Галоўнага ўпраўлення сярэдняй, дашкольнай і спецыяльнай адукацыі Міністэрства адукацыі Рэспублікі Беларусь Булаўкіна Ірына Уладзіміраўна,рэктар установы адукацыі “Магілёўскі дзяржаўны абласны інстытут развіцця адукацыі” Жудро Міхаіл Міхайлавіч,намеснік дырэктара па навукова-даследчай рабоце Навукова-метадычнай установы ”Нацыянальны інстытут адукацыі“ Міністэрства адукацыі Рэспублікі Беларусь, кандыдат педагагічных навук, дацэнт Зелянко Вольга Уладзіміраўна.Яны пажадалі ўсім добрага настрою, упэўненасці ў сваіх сілах, плённай працы і поспехаў.

24 лютага юныя даследчыкі традыцыйна прадстаўлялі свае работы ў дзвюх секцыях – “Лінгвістыка” (вучэбны прадмет “Беларуская мова”) і “Літаратуразнаўства” (вучэбны прадмет “Беларуская літаратура”).

У секцыі “Лінгвістыка” у склад журы ўваходзілі: Зелянко Вольга Уладзіміраўна, намеснік дырэктара па навукова-даследчай рабоце Навукова-метадычнай установы ”Нацыянальны інстытут адукацыі“ Міністэрства адукацыі Рэспублікі Беларусь, кандыдат педагагічных навук, старшыня журы; Варановіч Валерый Леанідавіч, дацэнт кафедры беларускай філалогіі ўстановы адукацыі ”Гродзенскі дзяржаўны ўніверсітэт імя Янкі Купалы“, кандыдат філалагічных навук; Доўгаль Алеся Валер’еўна, дацэнт кафедры тэарэтычнай і прыкладной лінгвістыкі ўстановы адукацыі “Магілёўскі дзяржаўны ўніверсітэт імя А.А.Куляшова”, кандыдат філалагічных навук.

У секцыі “Літаратуразнаўства” ўдзельнікаў конкурсу ацэньвалі: Мельнікава Зоя Пятроўна, прафесар кафедры беларускай філалогіі ўстановы адукацыі “Брэсцкі дзяржаўны ўніверсітэт імя А.С.Пушкіна”, доктар філалагічных навук, старшыня журы; Воюш Інга Дзмітрыеўна, дацэнт кафедры гісторыі журналістыкі і менеджменту СМІ Інстытута журналістыкі Беларускага дзяржаўнага ўніверсітэта, кандыдат філалагічных навук; Караткевіч Вячаслаў Іванавіч, старшы выкладчык літаратуры і міжкультурных камунікацый установы адукацыі “Магілёўскі дзяржаўны ўніверсітэт імя А.А.Куляшова”.

25 лютага былі падведзены вынікі конкурсу і прайшла ўрачыстая цырымонія ўзнагароджвання пераможцаў. Усяго было ўручана 18 дыпломаў Міністэрства адукацыі Рэспублікі Беларусь: 4 дыпломы I ступені, 6 дыпломаў II ступені і 8 дыпломаў III ступені.

Удзельнікі Магілёўскай вобласці ўзнагароджаны 2 дыпломамі I ступені. У секцыі “Лінгвістыка” дыпломам I ступені ўзнагароджаны вучні XI класа ДУА “Гімназія № 3 г. Магілёва” Зайцаў Мацвей і Вяліканава Юлія (кіраўнік работы – настаўнік беларускай мовы і літаратурыМаксімава Іна Віктараўна). Работа пераможцаў была прысвечана асаблівасцям ужывання фразеалагізмаў з метэаралагічным кампанентам у беларускай і кітайскай мовах. У секцыі “Літаратуразнаўства” дыпломам I ступені ўзнагароджана вучаніца X класа ДУА “Гімназія № 3 г. Бабруйска”Рамнёнак Вольга. Яна прадстаўляла работу пад назвай “Лёс Барыса Мікуліча як адлюстраванне трагедыі беларускай інтэлігенцыі ў перыяд рэпрэсій” (кіраўнік работы – настаўнік беларускай мовы і літаратуры Лісава Таццяна Іванаўна).

Віншуем усіх пераможцаў конкурсу і іх настаўнікаў

і жадаем далейшых перамогна шляху даследаванняў!